بث مباشر جدا *** بقلم السيدابوطاحون

بث مباشر جدا *** بقلم السيدابوطاحون
**********
يا ضاربين الودع ..
مين اللي قتل الجدع ؟
يا شاربين الوجع ..
مين اللي فينا خدع ؟
ومين اللي فينا انخدع ؟!
لفيت وداخ اللف ..
و وصلت قاري الكف
اوع ياعقلي تخف ..
يافرقة الاوغاد ..
يا ظلم من يوم " عاد "
مين اللي قتل الواد ؟
يمكن قتل نفسه ؟ !
ظابط بدبوره
و موقف الصوره
ع الضحكه
والدمعه ..
علي خدنا والعه
يعني السواد يزداد
من غير ولا شمعه !
مين اللي قتل الواد ؟
يمكن قتل نفسه ؟!
طب رد يا قاضى
ولا انت مش فاضي ..
طب وأنت يا رئيسي
أنت كده راضي !
ولا انت مش فاضي !
مين اللي قتل الواد ؟
يمكن قتل نفسه ؟!
الواد فقير وامه
في الضلمه بتنادي ..
ردو عليها يا ناس
فى الدلتا والوادي
مين اللي قتل الواد ؟
يمكن قتل نفسه ؟!
يا " عمرو " هات ابنك
إياك تتأخر
دا "مكين" في رقبتنا
في ودنا يكبر..
دبحوه ولاد الإيه
من قبل ما يفطر
يا باشا ولا يا بيه ..
هتقول لربك إيه
في زنقة المحشر ؟!
مين اللي قتل الواد ؟
يمكن قتل نفسه ؟!
********* بث_مباشر_جدا السيدابوطاحون الاخنوم