أموت وأصحى *** بقلم السيدابوطاحون

أموت وأصحى *** بقلم السيدابوطاحون
*********
صباح الخير
صحيت من النوم
لقيت قلبي بيندهلي
وقطع النور صبح عادة
صباح النور
ونور ربك مغرقنا
وكات القهوة كالعادة ومن غير وِش
وأنا ما كرهت قد الوَش
وطلة جحش
مدلع علي الشاشة
عايز قال ايه يعلمنا !!
وواحد إمتلك قلبي لكنه غش
نديت علي قلبي يطلعلي

صباح الشهد والأحلام
لقيت قلبي قصاد عيني
بيضحك لي
مسكت بايدي شرايني

صباح المسك
والياسمين والعنبر
صباح أعطر
صباح أحلي من السكر

وقلت أقدر
بإيدي أسلك الشرايين
وأجري بخفة الغزلان
وأتمنظر
وقلت أحكلي
علي اللي كان
ووشي كرمشه النَهَجان
و وشوشني ووشوشته
وبدي أنضر
وقلب حديد
وصرت ف لحظه متغير
مفيش أزمات
مفيش لاضغط ..
ولا سكر

لقيت الحب " عصفوري "
علي الشباك
لا كَسِّل ولا اتغير

صحيت م النوم
وكالعادة لقيت اليوم بدأ بدري
لقيت أبني بدأ يبني
وصحي القوم
وقلي قوم
أنا الإخنوم

صحيت م النوم
لقيت قلبي بناديلي
وصحصحني
وعلق كل قناديلي
وفرحني
كتب علي طرف منديلي
أنا الإخنوم
ودا نخلي
ودا نحلي
ودا عسلي ملا نيلي

صباح النور .. صباح الخير
صباح نادي
لكن نَداه مش عادي
جدوره سارحه ف بلادي
كما الأحلام
مفيش سُخرة
مفيش سحره
مفيش خونة
مفيش فرقة بتتدحلب
عشان تحلب غنَمَاتي
ومدوقشي أولادي
ولا فرقة تنام تكدب
تقوم تكدب
عشان تقفل شرايني !!
متعرفشي بأن الموت بيكرهني
بقالي سنين
تقول " ميات "
تقول " ملايين "
أموت .. وأصحي
وأصحي الناس ان نامت

صباح عاشق لكل براح
صباح أجمل من الجميلات
لقيت زهراء بتندهلي
يا بابا اصحي الفطار جاهر !!!

حبيبتي يا بنتي
سيبيني
مع الأحلام تدفيني

لكني هقوم
وجيلكم .. عرفتوني
أنا الإخنوم
*********