فانوسى القديم ! بقلم الشاعر المتألق حسن رمضان الواعظ
رمضـــان كـــــــــريم ............ فكرنى بفانوسى القديم
طلعتو طلعت ذكرياتى ........... رجعــت للـزمن الرحيم !
أيام ماكنا فى بيت أبونا صغيرين
بــالحب نتجمـع ونفطر فرحانيين !
والناس تهنى بعضها ................ بضمير سليم
******************
كنا نشارك بعضنا ............... فــى رفع الزينات
وفى وسطها فانوس ................ يحلى الأمسيات
الأكل كان طعمه جميل .............. ومـــلوش مثيـل
رمضان جميل لو فى النهار .......... أو لـو فـى ليل
وفانوس بشمعه يونس ............. البيت والحارات
*******************
ناكل كنافة أوقطايف ............. بعدها نمـلا المساجـــد
يفطر قرايب عندنــا ............. وتلقى دايماخيرنا زايد
يقصدنا مسكين نكرمه ........... ومن عنينا نفطره
نبعت لجارنا فهيم كنافة ......... وعمرنا مابنخسره
ونختم القــرآن تَنَــافُس ......... صغيرنا ويا كبيرنا عابد
*******************
أنا لسه فاكر فى ابتدائى ........ لمـا صمت عملـت إيـــــه
كت عينى ع الساعة تبص ....... اليوم طويل معرفش ليه
وكنــا نتسحـــر مــدمس ........... والزبادى عشــان نـصوم
أنا كنت عارف مِــن يصوم ........ يشــرب فــى جنـات النعيم
بــاب الريَّان هناك رضوان ....... هيقــــدم الميـــــه بإيديــه
حسن رمضان ـ كبير باحثين بالوعظ بالأزهر الشريف .
ليست هناك تعليقات:
إرسال تعليق